Pontevedra, 21 de xullo de 2026. O concelleiro de Infraestruturas, César Mosquera, anunciou que o Concello de Pontevedra vén de presentar a solicitude formal para acollerse ao decreto de axudas estatais destinado a paliar os graves danos provocados polos temporais do pasado inverno. A petición municipal inclúe un paquete de actuacións valorado en preto de 2,5 millóns de euros, co obxectivo de acadar a máxima subvención permitida por estas axudas, que cobre ata o 50 % do importe, é dicir, 1.250.000 euros.

O prazo para presentar estas solicitudes remata hoxe mesmo ás 15:00 horas, o que obrigou aos funcionarios municipais a realizar un enorme esforzo. Segundo explicou Mosquera, o procedemento implicou un "papeleo bastante voluminoso" e requiriu unha cantidade de documentación "enorme" para xustificar cada unha das actuacións solicitadas.

Ademais, un dos principais atrancos na tramitación foi a estrita condición de que todos os bens afectados tiñan que estar inscritos no inventario de bens municipais, non sendo suficiente con que figurasen no catastro a nome do Concello. Este ríxido requisito burocrático obrigou a deixar fóra certas partes dalgunhas obras ou a tramitar de urxencia a inclusión doutras, como o centro social de Campañó.

Principais actuacións incluídas na solicitude

A relación de proxectos remitida polo Concello para a súa reparación mediante estes fondos estatais inclúe intervencións fundamentais en infraestruturas, edificios e espazos públicos. As actuacións máis destacadas segundo o seu importe son:

• Cuberta do Recinto Feiral: A reparación dos danos sufridos pola cuberta do recinto ascende a 750.000 euros.
• Colector do río dos Gafos: A reposición do tramo da tubaxe rebentada pola caída de árbores á altura da estación de autobuses ten un orzamento solicitable de 658.000 euros. (Cabe recordar que esta cifra non inclúe o total da obra, xa que algunhas partes do terreo non puideron certificarse no inventario municipal).
• Rúa do Santo: A actuación neste punto está valorada en 491.000 euros.
• Camiños do rural: Solicítanse 393.000 euros para arranxar diversos viais, muros e firmes do rural que quedaron seriamente deteriorados polas intensas chuvias.
• Colector de pluviais na rúa Celso Emilio Ferreiro: A reparación desta infraestrutura, cuxas deficiencias están a provocar asolagamentos, suma 135.000 euros.

A maiores, tamén se inclúen outras reparacións de menor contía en edificios e instalacións municipais, como a reparación de danos no propio edificio administrativo (53.000 euros), no Centro Social de Campañó (39.000 euros) e no Pavillón da Xunqueira (35.000 euros).

O concelleiro mostrouse cauto pero satisfeito co traballo técnico realizado polas áreas do Concello, asegurando que dende a administración local "os deberes fixémolos". Aínda que recoñeceu descoñecer o importe total da bolsa estatal, o concelleiro estimou que Pontevedra será un dos concellos que máis fondos solicite debido ao rigor da súa petición: "A ver se somos tamén dos que máis leva. (...) Xa veremos o que resulta", concluíu.