Pontevedra, 6 de maio de 2024. A concelleira de Rural, María José Abilleira, deu conta das distintas actuacións que se porán en marcha no rural pontevedrés, e que suman preto de 1 millón de euros de investimento municipal. 

A edil explicou que ao longo dos últimos meses mantivo numerosas reunións, tanto cos colectivos veciñais das parroquias como con veciños e veciñas a título particular; accións que considera «fundamentais á hora de manter un contacto continuo coa veciñanza para darlles traslado directo das actuacións a realizar como tamén para coñecer as súas necesidades». 

«Os veciños e as veciñas son as persoas que mellor coñecen as súas parroquias, son elas as que fan un seguimento constante e permanente das mesmas. Recoñezo que non podo estar máis satisfeita pola comunicación lograda estes últimos meses», sinalou. 

Logo desta rolda de contactos, a edil deulles orde aos servizos técnicos do Concello de Pontevedra, máis en concreto ao departamento de obras no rural, para valorar e priorizar as actuacións que se levarán a cabo, especificadas a continuación: 

- Reurbanización da Rúa San Cristovo, Lourizán 

- Pavimentación da Rúa das Pereiras (A Parda) 

- Asfaltado do barrio de Casaldarado, Lérez 

- Asfaltado e canalización de pluviais no lugar do Outeiro, Lérez 

- Ampliación e reasfaltado de pista na Ermida, Cerponzónss 

- Pavimentación da pista no lugar de Pilarteiros, Sto. Andrés de Xeve 

- Creación dunha ponte de madeira peonil no lugar de Os Fontáns, Sta. María de Xeve 

- Acondicionamente do aparcadoiro do campo da festa de Marcón 

A intención do Concello é licitar conxuntamente todas as actuacións co fin de simplificar os trámites necesarios para levalas a cabo. Ademais María Xosé Abilleira sinalou que os fondos para as mesmas serán incluídos na vindeira modificación de crédito.