Pontevedra, 22 de xuño de 2026. O Concello de Pontevedra avanza na posta en valor do espazo público con dúas actuacións nas zonas verdes da cidade. Trátase da plantación de novas especies no parque de Amalia Álvarez, como paso final da súa reforma integral, e da mellora dos xardíns da vía perimetral da praza de Barcelos, unha intervención orientada a reparar os estragos provocados polas chuvias do inverno e renovar a súa imaxe. 

No caso do parque de Amalia Álvarez, estes traballos de xardinería supoñen o paso final dun proceso de remodelación integral que comezou meses atrás. A actuación dá resposta a un compromiso adquirido coa veciñanza do barrio, quen solicitara melloras tras constatar o desgaste das instalacións. Tras unha primeira fase que incluíu a substitución do antigo mobiliario por novos bancos máis confortables de madeira e prefabricados, así como o saneamento do arborado, as brigadas acometeron agora a recuperación definitiva da xardinería. 

O xardín xerado en Amalia Álvarez ten un marcado carácter ornamental e estrutúrase para poñer en valor a zona e solucionar problemas previos de compactación do solo e deterioro vexetal. O deseño consiste na creación de parterres na base das árbores protexidos con mallas antiherbas. Nestes espazos estanse a plantar especies trepadoras (como a Hedera algiriensis), pequenos arbustos (como o Rhododendron e o Ruscus hipoglossum) e unha coidada selección de plantas herbáceas e vivaces que inclúe Liriope muscari, Persicaria affinis ou Hemerocallis Stella de Oro. A actuación complétase coa achega de abono e a reparación do sistema de rega por goteo para garantir o uso eficiente dos recursos hídricos. 

A praza de Barcelos 

Os traballos na contorna da praza de Barcelos céntranse na mellora dos longos parterres lineais que bordean a rúa. Estes espazos sufriran importantes danos no pasado inverno debido ás intensas chuvias, que provocaran o arrastre da cortiza e o deterioro do estrato vexetal. Para solucionar esta situación e devolverlle o seu esplendor, o departamento de mantemento apostou pola plantación dunha vexetación moi vistosa pero de baixo mantemento. 

Estes espazos integran tamén un sistema de rega por goteo e foron poboados cunha mestura de plantas herbáceas e especies de flor que lle achegan gran riqueza cromática que embelece a transición entre o tránsito peonil e o tráfico rodado, garantindo ao mesmo tempo unha conservación moito máis sinxela e sostible a longo prazo.