Pontevedra, 14 de decembro de 2020. A Xunta de Goberno Local vén de aprobar o convenio de colaboración coa Deputación provincial de Pontevedra para a execución da vía de conexión de Rosalía de Castro coa avenida de Marín na parcela que na actualidade ocupan os circos. A sinatura final do acordo será cando a Deputación aprobe o convenio na súa Xunta de Goberno. 

A portavoz do Goberno, Anabel Gulías explicou que se trata dun expediente complexo porque hai moitas administracións implicadas no seu desenvolvemento: 

• Xunta de Galiza. Coa cesión do treito urbano de Rosalía de Castro, unha cesión xa realizada.
• Costas do Estado: que tiña que emitir informe ambiental que xa consta no expediente, pero que está pendente da cesión demanial da parcela que se vai a ocupar para facer a vía.
• Deputación provincial: encargada da financiamento e da redacción do proxecto.
• Concello de Pontevedra: encargado da licitación e da execución da obra.

O Concello de Pontevedra estará en disposición de iniciar a obra ao longo do ano que vén, no caso de obter a cesión de Costas, cuxas conversas están moi avanzadas; e tamén o informe sectorial de Adif, que tamén está pendente. 

O proxecto da nova vía entre Rosalía de Castro e a avenida de Marín ten un custe de licitación de 938.824,63 euros (264.964,58 euros se achegarán este ano) e un prazo de execución de 9 meses. Ao seu remate a titularidade pasará a mans do Concello. 

Trátase dunha vía que permitirá desviar o tráfico pesado cara a avenida de Marín para retiralo do treito máis urbano, e tamén permeabilizar unha das saídas sur da cidade. 

O proxecto 

O proxecto contempla sendas peonís ao longo dos 97 metros de lonxitude do vial, para conectar coa senda da ría da avenida de Marín; levará dous carrís de circulación, un en cada sentido; unha rotonda en cada extremo do vial; 3 novos pasos de peóns sobreelevados; e alumeado de alta calidade ao longo de todo o vial e columnas de iluminación en ambas rotondas para evitar problemas de accesibilidade respecto da luz. A construción da rotonda de conexión coa avenida de Marín suporá que se teña que refacer un pequeno treito da propia avenida de Marín.