CENTOS DE PERSOAS ASINAN O PRIMEIRO DÍA

O BNG arranca con éxito en Pontevedra a campaña de recollida de sinaturas contra a suba da tarifa eléctrica

20210624_122648
O alcalde de Pontevedra asinando o escrito
O BNG arranca con éxito en Pontevedra a campaña de recollida de sinaturas contra a suba da tarifa eléctrica

Pontevedra, 24 de xuño de 2021. Nunha mesa instalada na praza da Peregrina, o BNG comezou hoxe na comarca a campaña de recollida de sinaturas contra a estafa que supón a suba abusiva da tarifa eléctrica, nestes momentos a máis alta da historia, que coincide, ademais, cun contexto de crise sanitaria e económica como o que estamos a viver.

O deputado no Parlamento Galego, Luís Bará, salientou que esta situación “está beneficiando claramente ás empresas do oligopolio eléctrico. Temos a conta de resultados do ano 2020 no que ENDESA tivo 1394 millóns de beneficios e Iberdrola 3610, mentres se estaban producindo graves prexuizos á maioría social, ás persoas que están nunha situación de emerxencia enerxética e á pequena e mediana empresa”.

Esta situación, afirmou o deputado nacionalista é máis difícil de entender aínda nun país como Galiza que é excedentario na produción de enerxía e que exporta o 30% da que produce. Por este motivo o BNG considera necesario dar unha resposta contundente de denuncia desta situación, pero tamén de presentar alternativas e propostas.

Neste sentido Bará salientou catro medidas:

  1. Baixada do IVE na factura eléctrica, do actual 21% ao 4% (superreducido), igual que outros servizos de primeira necesidade como o transporte e auga, e eliminación do imposto especial da electricidade.
  2. Garantir a subministración eléctrica a toda a poboación, establecendo medidas para que non se lle poida cortar a luz a ningunha persoa sen recursos. 
  3. Unha tarifa eléctrica galega que abarate a factura da luz para as galegas e galegos, en beneficio de [email protected] particulares e das nosas empresas, de maneira que se compense o rol da Galiza como excedentaria na produción de enerxía eléctrica e o forte impacto social e ambiental derivado do seu papel produtor.
  4. Creación dunha empresa pública galega de enerxía, para que o sector publico galego, tamén os Concellos, poidan ter unha participación directa no sector enerxético nun contexto no que estamos de desenvolvemento das enerxías renovábeis, e facer que o actual boom eólico teña criterios sociais, ambientais e repercuta positivamente no territorio. O deputado nacionalista recalcou que isto é posíbel no marco europeu, porque existen varias empresas públicas que están actuando en Galiza que son de capital chinés (Electricidade de Portugal), italiano (ENDESA) ou noruegués (Statkraft).

En definitiva, concluíu Bará, o que se propón o BNG é “romper con esta situación na que os prezos da electricidade e toda a regulación do sector eléctrico está feita ao ditado das grandes empresas do oligopolio enerxético que son as que obteñen beneficios multimillonarios, e que son as mesmas das portas xiratorias, e para que se regule o sector enerxético de tal xeito que se beneficie á maioría social e que nos beneficie tamén ás galegas e galegos, ao ser o noso un país excedentario na produción de enerxía”

O BNG arranca con éxito en Pontevedra a campaña de recollida de sinaturas contra a suba da tarifa eléctrica