Barro, 21 de marzo de 2025. Rematou a instalación na nova cuberta do pavillón municipal de máis de 130 placas solares, coas que se dará subministro eléctrico ás instalacións municipais de Santo Antoniño. O excedente de produción verterase á rede eléctrica xerando unha compensación económica para o concello e reducindo aínda máis a factura eléctrica.

Para o alcalde, Xosé Manuel Fdez. Abraldes, este proxecto “é un paso clave para a autonomía enerxética de Barro e un aforro significativo na factura da luz. Demostramos que, aínda sendo un concello pequeno, podemos liderar na descarbonización e construír un futuro máis sostible para toda a sociedade”.

Esta actuación, da man de outras que vén desenvolvendo o concello nos últimos anos, como o cambio da LED de grande parte da alumeado público ou actuacións de aforro nas depuradoras, ten como obxectivo camiñar cara a descarbonización e abaratar a factura eléctrica, dado que supón un dos maiores desembolsos nas contas anuais do concello.

O orzamento deste proxecto ascendeu a 72.707,87 euros, dos cales 19.551 foron financiados con cargo a fondos propios municipais e os restantes con cargo a fondos europeos.