Barro remata o ano con fibra óptica en todas as parroquias
![dav](/asset/thumbnail,992,558,center,center/media/bngpontevedra/images/2020/12/22/2020122210294963836.jpg)
Barro, 22 de decembro de 2020. Despois de dous anos de traballos, Barro xa conta con liña de fibra óptica en todas as parroquias; polo que máis do 95 % dos fogares poden disfrutar dun servizo de banda ancha de nova xeración.
A parroquia de Valiñas foi a última na que se realizou o despregue da fibra, polo que os usuarios da antiga liña xa poden contratar fibra óptica e a maioría xa contan con este servizo.
A implantación da nova rede permite que os veciños e veciñas dun concello rural como Barro conten coa posibilidade de contratar un servizo de calidade para as súas telecomunicacións, o que se fixo máis necesario que nunca nesta época de pandemia na que aumentou o teletraballo e no que o estudantado depende da conexión a internet para poder seguir cos seus estudos.
Para o alcalde, Xosé Manuel Fernández Abraldes, é moi positivo que a liña de fibra xa chegase a todos os lugares para substituír a antiga liña de cobre convencional. Foron meses de xestións para que o proceso se realizase da mellor maneira posíbel e coa maior celeridade. Ademais, tamén se conseguiu que a nova rede chegase aos dous polígonos industriais, ademais do polígono de Outeda-Curro, tamén ao polígono de Sequeiros, no que inicialmente non estaba previsto.
O seguinte obxectivo é conseguir que os pequenos lugares do concello que teñen o servizo telefónico a través dun sistema inalámbrico e aos que nunca chegou unha liña convencional, tamén poidan dispoñer da banda ancha. Con esta finalidade o alcalde está en conversas coa compañía Telefónica para que estuden a viabilidade de estender a estes veciños a liña de fibra.