Barro, 6 de marzo de 2026. O Concello de Barro vén de iniciar as obras de mellora integral dos accesos ao Parque da Natureza da Ría de Barosa, un importante proxecto impulsado polo goberno local.

O alcalde, Xosé Manuel Fernández Abraldes, e o concelleiro de Obras de accesos a núcleos, Seguridade viaria e Humanizacións, Iván Bello Ferreiro, visitaron o inicio destes traballos, que permitirán transformar e humanizar a principal vía de acceso a este espazo natural emblemático do municipio.

A actuación desenvolverase ao longo de preto de 500 metros e contempla a implantación de medidas de seguridade viaria, a mellora e reorganización dos aparcadoiros, a creación dunha senda peonil segura que conectará as fervenzas co Camiño de Santiago e a renovación integral do alumeado público, entre outras intervencións.

O obxectivo deste proxecto é mellorar tanto a seguridade como a accesibilidade ao parque da natureza de Barosa, un dos principais atractivos naturais e turísticos do concello, ao tempo que se melloran as condicións para veciñanza e visitantes e se pon en valor un espazo natural e patrimonial de incalculable valor.

Durante a execución das obras poderán producirse restricións e modificacións puntuais no tráfico na zona. En todo caso, o acceso ao parque permanecerá sempre aberto para garantir que todas as persoas poidan seguir desfrutando deste espazo natural.