Pontevedra, 4 de xullo de 2025. A programación lúdico-cultural do World Multisport incluíu, nesta ocasión, unha oferta de visitas guiadas pola cidade en inglés, promovidas pola empresa municipal Turismo de Pontevedra. Dirixidas aos e ás deportistas e acompañantes, foron moi ben valoradas polos participantes. Entre as persoas que se sumaron aos roteiros guiados abundaban os que xa estiveran aquí noutras eventos de tríatlon e que agradeceron a oportunidade de coñecer “desde unha perspectiva moi diferente” a cidade, máis aló do aspecto deportivo que tiñan referenciado. 

Os percorridos pola cidade da man dunha guía profesional permitiulles descubrir a historia, cultura, monumentos e gastronomía dunha cidade acolledora e preparada para ser escenario dun evento do alcance do Multisport. E tamén a súa vida de rúa, unha realidade que engaiolou a moitos deles, que non dubidaron en cualificar o noso xeito de vivir como “un verdadeiro privilexio”, tal como lle transmitiron a súa cicerone. 

Sorprendeulles ver ás nenas e nenos xogando na rúa, a simbiose da historia e pasado co presente. Unha apreciación na que concordaron boa parte das persoas que quixeron coñecer algo máis da cidade que lles abría ás portas a través do deporte. Sumáronse ás visitas guiadas Multisport persoas de 11 estadas distintos: Nova Zelandia, Estados Unidos, Australia, Canadá, Xapón, Dinamarca, Holanda, Francia, Reino Unido, Irlanda e Bélxica. 

Percorridos guiados 

Paralelamente as visitas guiadas en inglés co gallo do World Multisport, desenvolvidas entre os días 19 e 29 de Xuño, Turismo de Pontevedra deu o disparo de saída ao seu programa estival de visitas. Foi o 23 de xuño e estenderanse ata o 30 de setembro. 

As visitas patrocinadas polo Concello de Pontevedra e Turismo de Pontevedra teñen unha duración de 1 hora e 45 minutos, inclúe a entrada a monumentos. 

As persoas interesadas en participar nestas visitas guiadas poden coñecer a oferta, e facer a reserva de praza, a través da web oficial da empresa turística municipal visit-pontevedra, ou de xeito presencial na oficina de turismo (praza do Concello, esquina avda. Montero Ríos) É desde aquí, onde parten cada día, liderados por dunha guía cun recoñecible paraugas verde. 

O custe da visita é de 7€, aínda que hai tarifa reducida de 5€ para persoas desempregadas, xubiladas, con discapacidade e para visitantes aloxados na cidade. Para crianzas menores de 12 anos é de balde. 

Por outra banda, da web de Turismo de Pontevedra poden descargarse folletos turísticos da Boa Vila nos seguintes idiomas: galego, español, inglés, alemán, italiano, portugués e francés.