A concelleira de Deportes de Pontevedra, Anabel Gulías, acudíu á Praza da Cítara, no barrio da Parda, para presenciar o primeiro partido que se disputou na nova pista de petanca. Este campo, recén rematado, xa abriu a mediados desta semana pasada para que os participantes da liga puideran adestrar nel antes da estrea competitiva. 

A adecuación destas instalacións foi adxudicada á empresa Garocaprim e contou cun orzamento de 9.776,80 euros. Para a execución da pista, os operarios escavaron parte da zona verde da praza, creando así o terreo de terra e area necesario para a práctica deste deporte. Con esta nova infraestrutura, a zona da Parda e Pontevedra Leste suma a súa segunda pista (xunto coa da rúa dos Soutos), ampliando a extensa rede municipal que xa conta con 21 campos. 

Ademais, están en carteira o novo campo de petanca de Acevedo, na parroquia de Ponte Sampaio, que se executará á par que o novo local social, e un novo campo na parroquia de Salcedo, ao carón da Casa Verde. Ampliando así estas superficies deportivas a 23. 

O partido inaugural enmarcouse na Liga de Petanca de Pontevedra promovida pola Agrupación de petanqueiros/as de Pontevedra e polo Concello, que, nestes momentos, está formada por 16 clubes. 

A concelleira de Deportes, Anabel Gulías, puxo en valor esta disciplina porque vai moito máis alá da actividade física xa que "é unha ferramenta fundamental para o encontro xeneracional e fomenta o benestar da veciñanza". Así mesmo, lembra que con este tipo de infraestruturas e eventos, Pontevedra "coida as súas tradicións" mentres promove un deporte activo en todos os barrios e parroquias do municipio.