Caldas de Reis será este verán unha das sedes do Festival Atlántica, o prestixioso encontro internacional de narración oral que cada ano percorre Galicia e Portugal con contos, historias e palabras que atravesan fronteiras. O municipio acollerá dúas funcións gratuítas, abertas a todos os públicos, no entorno privilexiado do Malecón do Xardín Botánico.

A primeira cita será o mércores 2 de xullo ás 21.00 h, co espectáculo “Fare le corna” do narrador Simone Negrín, unha proposta para público adulto en galego e castelán que mestura tradición oral italiana e galega con humor, identidade e moita retranca.

A segunda función chegará o venres 4 de xullo ás 11.00 h, da man do artista aragonés Oswaldo Pai, que presentará “Artiloxios”, un espectáculo dirixido a público infantil (+8 anos), adolescente e adulto, en castelán, cunha chea de cachivaches, imaxinación e contacontos que fan sorrir e pensar ao mesmo tempo.

“O Festival Atlántica é unha referencia da cultura viva e comunitaria, e é unha honra que Caldas participe por segundo ano consecutivo como sede. Queremos seguir convertendo espazos naturais e urbanos en escenarios de encontro, palabra e imaxinación”, sinala o tenente de alcalde e concelleiro de Cultura, Manuel Fariña.

“Este tipo de eventos proxectan a imaxe de Caldas de Reis como un concello aberto ao mundo, orgulloso da súa identidade e da súa paisaxe, pero tamén disposto a dialogar con outras culturas desde a palabra. O Festival Atlántica non só nos trae espectáculos de calidade: dálle voz á memoria, á emoción e á diversidade, que son os alicerces dunha cultura con raíces e con futuro”, engade Fariña.

Ambas funcións terán lugar no Parque-Xardín de Caldas de Reis, e a entrada será libre ata completar aforo.

Esta iniciativa forma parte do compromiso do Concello cunha programación cultural diversa, atractiva e dinámica, na que a narración oral volve ocupar un lugar de honra como vehículo de expresión, memoria e celebración colectiva.