Pontevedra, 26 de abril de 2021. Logo da xuntanza que tivo lugar en Madrid na semana pasada, convocada polo Ministerio de Transición Ecolóxica e Cambio Climático e na que particpou a Xunta, o Concello de Pontevedra, a empresa ENCE, os representantes sindicais e unha representación da industria forestal, o BNG considera que a saída da fábrica da ría de Pontevedra é unha posibilidade real que debe ser tida en conta e que se deben estudar todas as opcións para facela realidade. Segundo o deputado nacionalista Luís Bará:  “Estamos diante dunha oportunidade para sacar a fábrica da ría e para desenvolver un novo proxecto industrial que peche o ciclo produtivo en Galiza”.

Segundo Bará, “a Xunta non pode poñerse de perfil, debe poñerse á fronte deste proceso xa que ten as competencias en ordenación do territorio, medio ambiente e desenvolvemento industrial. Por iso debe impulsar e liderar o estudo de alternativas de emprazamento e as negociacións para a construción dunha nova factoría que permita xerar novos postos de traballo, tanto no sector forestal como no aproveitamento da ría”.

Para o BNG, o estudo destas alternativas debe ser compatíbel co desenvolvemento dun novo modelo forestal, baseado na biodiversiade e non no monocultivo, e co impulso dunha nova política para o monte que aposte decididamente pola multifuncionalidade e pola potenciación dos seus valores ambientais, sociais e produtivos.

Luís Bará: “Estamos diante dunha oportunidade para sacar a fábrica da ría e para desenvolver un novo proxecto industrial que peche o ciclo produtivo en Galiza”

Segundo Luís Bará, “estamos diante dunha grande oportunidade para recuperar a ría, para preservar a saúde e a seguridade da poboación, para garantir un desenvolvemento urbano integrador, e para xerar máis postos de traballo tanto na actividade forestal sustentábel como no aproveitamento pesqueiro e marisqueiro da ría de Pontevedra”.

Batería de iniciativas parlamentarias

Xunto coa proposición non de lei na que demanda que a Xunta exerza as súas competencias e se poña á fronte das xestións para o traslado de ENCE, o BNG rexistrou unha interpelación e preguntas parlamentarias ao goberno para que dea conta das xestións que está a realizar sobre unha eventual saída de ENCE da ría de Pontevedra. Entre outras cuestións, o deputado nacionalista Luís Bará pregunta sobre a viabilidade da construción dunha nova factoría que peche o ciclo produtivo, sobre os efectos positivos que podería ter este proxecto para a ría de Pontevedra e para o emprego, e sobre as previsións de desenvolvemento dunha nova política forestal e para o monte baseada nos principios da biodiversidade e da multifuncionalidade.

Petición de comparecencia da Directora Xeral de Calidade Ambiental sobre a contaminación por mercurio

Ademais das iniciativas sobre o traslado de ENCE, o grupo parlamentar do BNG tamén rexistrou a pasada semana unha petición de comparecencia no parlamento, na comisión de medio ambiente, da Directora Xeral de Calidade Ambiental, Sostenibilidade e Cambio Climático para que dea conta dos alarmantes informes sobre contaminación por mercurio nos terreos e na contorna de ELNOSA e ENCE, e sobre os potenciais riscos para a saúde da poboación, para as augas superficiais e subterráneas, para as augas da ría e para as actividades pesqueiras e marisqueiras.