Pontevedra, 10 de xuño de 2025. A alcaldesa en funcións, Eva Vilaverde visitou esta mañá na rúa Ribeira dos Peiraos, na desembocadura do Gafos, o inicio das limpezas integrais de barrios adscritas ao novo contrato de residuos que comezaron no barrio de San Roque - A Moureira. Acompañada do concelleiro responsábel do servizo, Xaquín Moreda comprobaron o despregue de medios persoais e materiais na zona dende primeira hora da mañá.

Eva Vilaverde explicou que se trata "dun despregue moi profundo. Queremos ir limpando por barrios e empezamos por aquí porque somos conscientes de que lle facía falta". Recordou que se estará na zona todo o tempo que sexa necesario con todos os medios humanos e os recursos dispoñibles "para poder facer unha limpeza profunda de rozas, de limpeza de bordes, varridos, baldeos...". Catorce operarios en distintas funcións e máquinas varredoras, baldeadoras, máquinas de chorreo de pavimentos, camións... formaban o dispositivo.

A alcaldesa en funcións indicou que a nova maquinaria do servizo irase incorporando progresivamente nos vindeiros seis meses e "mentres tanto, e a medida que se van sumando medios humanos, imos facer esa concentración por barrios para poder facer unha limpeza integral e deixar toda a cidade varrida para cando se acabe de despregar toda a maquinaria".

"Creo que xa se empeza a notar o novo contrato, ese é o obxectivo: dar un paso e un pulso máis alá", concluíu Eva Vilaverde.