Manu Fariña propón avanzar nun modelo que poña ás persoas por diante dos coches

19-03-14-Manu Fariña 1
Manu Fariña propón avanzar nun modelo que poña ás persoas por diante dos coches

Caldas de Reis, 17 de xuño de 2020. O BNG propón avanzar na peonalización do casco histórico de Caldas para poñer en valor o espazo público da vila e gañar espazo para as persoas nun momento no que é máis necesario que nunca.

No actual contexto sanitario e social, o BNG insiste na peonalización do entorno da Prazuela, o que permitirá crear un gran entorno peonil no corazón da vila que facilitará que tanto os caldenses como todo aquel que nos visite poida disfrutar do espazo público mantendo o distanciamento social.

“Cidades como Vigo, Zaragoza, Barcelona, París ou Milán están avanzando nun modelo que o BNG leva poñendo en práctica durante anos en vilas como Allaríz e Tomiño ou cidades como Pontevedra. Caldas non pode permitirse o luxo de quedar atrás pola falta de valentía política do goberno municipal” sentenciou o portavoz municipal do BNG.

A peonalización deste entorno permitiría ademais a posta en valor de elementos como a fonte da burga e o lavadoiro termal, os cales non só son elementos que forman parte da historia da nosa vila senón que son parada obrigada dos visitantes e peregrinos e son quizais os máis importantes reclamos turísticos de Caldas.

Dende o BNG esixímoslle ao goberno municipal que se deixen de escusas de mal pagador e comecen a traballar para que Caldas non perda unha vez máis o tren das vilas e cidades que avanzan e progresan. Pois neste momento máis que nunca a veciñanza estanos a pedir que tomemos decisións e fagamos o posible para facer de Caldas un lugar máis seguro e máis amable coas persoas.

“Queremos que Caldas sexa un concello que coide e valore o espazo público, pois é un espazo que nos pertence a todas as persoas, sen embargo o espazo público agora mesmo está completamente dominado polo vehículo privado. Debemos invertir a tendencia e poñer ás persoas por diante dos coches” manifestou Manuel Fariña.

Manu Fariña propón avanzar nun modelo que poña ás persoas por diante dos coches